Margery Paston to John Paston, 24th December 1459

15/16th Century
Location of Original:
British Library

To my ryght worschipful husbond, John Paston.

Ryght wvrschipful husbond, I recomaund me on-to yov. Plese it yov to wete that I sent yovr eldest svnne to my Lady Morlee to haue knolage qwat sportys were husyd in here hows in Kyrstemesse next folloyng aftyr the deceysse of my lord here husbond. And sche seyd that þere were non dysgysynggys nere harpyng nere lvtyng nere syngyn, nere non lowde dysports, but pleyng at the tabyllys and schesse and cardys, sweche dysportys sche gave here folkys leve to play, and non odyr.

Yovr svnne dede hese heyrne ryght wele, as ye xal here aftyr þis. I sent yovr yongere svnne to the Lady Stabylton, and sche seyd acordyng to my Lady Morlees seyng in that, and as sche hadde seyn hvsyd in placys of wvrschip þere as sche hathe beyn.

I pray you that ye woll asay to gett sume man at Castere to kepe your botry, for the mane that ye lefte wyth me woll not take vp-on hym to breve dayly as ye commandyt. He seyth he hath not vsyd to geve a rekenyng nothyre of bred nor alle tyll at the wekys end, and he seyth he wot well that he xuld not condenyth; and therfore I soposse he xhall not abyd. And I trowe ye xall be fayne to porveye another man for Symond, for ye hare nevere the nerer a wysse man for hym.

I am sory that ye xall not at hom be for Crystemes. I pray you that ye woll come as sone as ye may. I xhall thynke my-selfe halfe a wedowe because ye xal not be at home, &c. God haue you in hys kepyng.
Wretyn on Crystemes Evyn.

By your M. P.

Back to previous page