John Osbern to John Paston, 27th May 1451

15/16th Century
Location of Original:
British Library

To my ryght reverent and worchepful Master, John Paston, be this delyverid.

Plese it your masterchep to wete that I have spoke wyth the Shereff at hese placez, mevyng to hym, as for that that was left wyth hese Under shereff, it is your wyl he shuld send a man of hese for it; for thow it were more ye wold gladly he shuld take it; he thanked yow, and sayde hese Under shereff was at London, and hymselff had non deserved, and if he had he wold a take it. And whan I departyd from hym, I desyerid hym a yen to send therffore, and than he seyde it shuld abyde tyl ye come hom, wherby I conceyve he wold have it, and be gladde to take it. Moreover, I remembred hym of hese promyses made before to yow at London, when he took hese oth and charche, and that ye were wyth hym when he toke hese oth, and oder dyvers tymes; and for tho promyses made be hym to yow at that tyme, and other tymes at the oyer determyner at Lynne, ye proposed yow be the trust that ye have in hym for to atempte and rere accions that shuld be to the avayle of hym and of hese office. He wold a know what the accions shuld be. I sayde I coude not telle hym, and than he seyde he wold do for yow that he may, excepte for the aquitell of the Lord Molyns men, in so meche as the Kyng hath wrete to hym for to shewe favour to the Lord Moleyns and hese men, and as he seyth the indytement longyth to the Kyng, and not to yow, and the Lord Molyns a gret lord. Also, as he seyth, now late the Lord Molyns hath sent hym a letter, and my Lord of Norffolk anoder, for to shew favour in these indytements, he darnot abide the joporte of that, that he shuld offende the Kinges commaundment. He know not how the Kyng may be informed of hym, and what shal be seyde to hym.

And than I sayde as for any joporte that he shuld abyde in any thing that he doth for yow, or be your desyre, you have offered hym, and wol performet, sufficient sewerte for to sawe hym harmeles, and therfore I supposid ther wold non resonable man thynk but that he myght do for yow wyth owte any joporte. And then he seyde he myth non sewerte take that passid C li.; and the Lord Molyns is a gret lord, he myght soon cause hym to lese that, and meche mo. Than I sayde, be that meane, in defawte of a Shereff, every man may be put from hese lyvelod; and thann he seyde iff it were for the lyvelode, men wold take hem the nerer for to abyde a joporte; but be hese feyth, as he swore, if the Kyng wryte ayan to hym he wol no lenger abyde the joporte of the Kyngges wrytyng, but he trustyth to Godde to inpanell seche men as shuln to hise knowleche be indeferent, and non comon jurors. As me semyth it wold do goode and [_if_] ye wolde gett a comaundment of the Kyng to the Shereff for to shew yow favour, and to inpanell jantelmen, and not for to favour non seche riotts, &c.; for he seyde that he sent yow the letter þat the Kyng sent hym, and ye seyde a man shuld gete seche on for a noble.

Item, I remembred hym of the promyses that he hath made to Temperley, and that if he wold make yow very trew promys, ye wold rewarde hym as meche as he wold desire, or any other resonable man for him, and asmoche and mor then any adverserry ye have wold gef hym; than he seyde he toke never no mony of non of hem alle. There was proferid hym at Walsyngham for the Lord Molyns xx. nobles, he had not a peny; moreover, I proferid hym, if he wold make yow promys that ye myght veryly trust upon hym, ye wold geff hym in hande as he wold desire, or to leve a summe if he wold a named it in a mene mannys hand, and seche as he hath trust to. And then he seyde, if he myght do for yow, or if he do any thyng for yow, then he wol take yowre mony wyth a good wyl; and other promys I coude not have of hym, but that he wol do for yow all that he may, excepte for the inditements. I conceyve veryly he hath made promys to do hese part that they shul be a quytte, but I suppose he hath made non other promys ayens yow for the lyvelode; but he lokyth aftyr a gret brybe, but it is not for to trust hym veryly wyth owte that he may not chese. I suppose he had no wrytyng fro my Lord of Norffolk as he seyde.

I was at Framyngham for to a spoke wyth Tymperley, Debnam, or Berry, and they were all ought. My Lord, as he came from London, he was at Yepysweche on Moneday, and when he wythowth the town toward Framyngham, he had all hese men ryde forth afore a gret pase, for he wolde felwe softely; and when hese men were owte of syght, he rode wyth v. men to a squieris place of hese therby, and on Tewsday, rodde my Lady to hym; and so I dede nought at Framyngham. No more at thys tyme, but All myghty Jesu spede yow, and have yow in hese kepyng. Wrete at Norwiche, the Thursday next aftyr Sent Austyn, &c.

Be your servunt,


Back to previous page