Margaret Paston to John Paston, Sept, about 1459

John Paston III
15/16th Century
Location of Original:
British Library

Ryth worchepfull howsbonde, I recomende me on to yow. Plesyt yow to wete þat I sent Tomas Bon to Edwarde Coteler to have one ansuer of the mater þat ye spak to hym of, and he sent me worde þat he hade spok to hys man þer-of, and he tolde hym þat he hade no wrytynge nor evidens of no swyche thyng as ye spak to hym of, ner not wyst were he scholde have cnowlage of no swyche thyng, save þat he tolde hym þat he receyvyd onys j.c. s. of the same rent; but and he may have cnowlage of ony man þat havyth ony wrytyng or ony thyng þat may out prevayle, he schal late yow have cnoulage therof.

As for Wylliam Yellverton, he come here never syn ye yede. As for my Lady Stapullton, att the wrytyng of thys letter sche was not come home. Wyndhamys erand to my Lady of Southefolk was to desiyr hyr gode Ladychep and to beseche hyr þat sche wold spek to my cosyn Evenyngham[288.4] þat he myt have hys gode wyll, for he levith in hope to have hys modyr, and he hath made menys to have her by John Gros and hys wyf, and by Bokynham and by odyr dyvers, and profuryth hyr to find suerte to acquitt hyr housbondys dettes, the qwyche is CCC. marc, and to payit doune on j. day. And by thys mene, as he seyth, he hathe bargeynid with j. marchande of London, and hath solde to hym the manage of hys son, for the qwyche he scal have vij. C. marc, and of þat the iij. C. marc schoulde be payd for the forseyd dettes; and also he proforyth to yeve hyr the maner of Felbryg to hyr joyntour[/@], and odyr large profors as ye schal here eraffter. As for the good wyll of my cosyn Hevenyngham, he seyth Wyndham[289.1] he schall never have hytt, nott for to have hyr gode konyth he [abydyth] hys soull hevy therof, for he is aferde þat and if the large profors may be perfor[m]yd, þat sche wyll have hym. My seyd cosyn preyith yow, att the reverens of Gode, þat ye wyll do yowyr therin to brec it and ye can. He schall be here ayen on Mychaell mas evyn. He was full sory þat ye wer outt att þis tyme, for he hopyd þat ye schoulde have do myche goode att þis tyme. He hathe seyde as myche ther ageyns as he dar do to have hyr gode modyrchep. My Lady of Southfolce sent j. letter to hyr yesterday by Stanle, the qwyche is callyd j. well cherysyd man with my seyd Lady, and desyiryng hyr in the letter þat sche wolde owe hyr godde wyll and favor to Wyndham in þat þat he desyiryd of hyr, and of more matterys þat ye schall here er after, for I suppose sche wyll schew yow the same letter and mak yow of hyr counsel in many thyngys, and I schall do my part as feythfully as I can to lett Wyndhamys porpose tyl ye come home. I pray yow sende me a copy of hys petygre, þat I may schew to hyr how worchepphull it is, for in goode feythe sche is informyd bi hyr gentyll son Gros and Bokenham þat he is mor worcheppfull in berthe and in lyvelode therto than they or ony odyr can preve, as I suppose. I pray yow lett nott thys mater be discuyryd tyl ye her more therof or after, for my cosyn Hevenyngham tolde myche here of in secret wyse, and of odyr thyngis qwyche ye schall have cnoulage of qwan ye come home, &c.

In hast, all in hast.

Gairdner had dated this letter circa 1453; Davis suggests that it is at the end of the decade or later, fitting in with other letters that John Paston III was able to write on behalf of his mother. The letter has no signature or address but is regarded as clearly from Margaret to John I.

Back to previous page