Margaret Paston to John Paston, 30th January perhaps 1453

15/16th Century
Location of Original:
British Library

To my right wurshipfull hosbond, John Paston, be this delyveryd in hast.

Right worshipfull hosbond, I recommawnd me to yow, praying yow to wete þat I spak yistirday with my suster, and she told me þat she was sory þat she myght not speke with yow or ye yede; and she desyrith if itt pleased yow, þat ye shuld yeve þe jantylman, þat ye know of, seche langage as he myght fele by yow þat ye wull be wele willyng to þe mater þat ye know of; for she told me þat he hath seyd befor this tym þat he conseyvid þat ye have sett but lytil therby, wherefor she prayth yow þat ye woll be here gode brother, and þat ye myght have a full answer at this tym whedder it shall be ya or nay. For her moder hath seyd to her syth þat ye redyn hens, þat she hath no fantesy therinne, but þat it shall com to a jape; and seyth to her þat ther is gode crafte in dawbyng; and hath seche langage to her þat she thynkyt right strange, and so þat she is right wery therof, wherefor she desyrith þe rather to have a full conclusyon therinne. She seyth her full trost is in yow, and as ye do therinne, she woll agre her therto.

Mayster Braklee be her yisterday to have spoke with yow; I spak with hym, but he wold not tell me what his erond was.

It is seyd her þat þe cescions shall be at Thetford on Saterday next komyng, and ther shall be my Lord of Norffolk and other with grette pupill, as it is seyd.

Other tydyngs have we none yett. þe blissefull Trynyte have yow in his kepyng. Wretyn at Norwyche, on þe Tewysday next befor Candelmasse.

I pray yow þat ye woll vowchesawf to remembr to purvey a thing for my nekke, and to do make my gyrdill.


M. P.

My cosyn Crane recommawndeth her to yow, and praytth yow to remembr her mater, &c., for she may not slepe on nyghtys for hym.

Back to previous page