Margaret Paston to John Paston, 21st October 1460

Display:
577

To my ryth worchepfull husbond, Jon Paston, be thys delyveryd in hast.

Ryth worchepfull husbonde, I recomand me to yow. Plesyth it yow to weet þat I receyvyd yowyr letter þat ye sent me by Nycolas Colmankwode
on Sonday last past. And as for the mater þat ye desyiryd me to breke of to my cosyn Rokwode, it fortunyd so þat he came to me on Sonday to dyner sone aftyr þat I had yowyr letter; and when we had dynyd, I mevyd to hym ther of in covert termys, as Playter shall informe yow eraftyr. And as I thowt by hym, and so ded Playter also by the langwage þat he had to us, þat he wold be as feythfull as he kowd or myte be to þat good Lorde þat ye wrot of, and to yow also, in ony thynge þat he kowde or myte do in case wer þat he wer set in offyse, so þat he myth owte do; and ther to he seyd he wolde be bownde in a m li and he was so myche worthe.

As for the todyr þat ye desyiryd I scholde meve to of the same mater, me semyth he is to yonge to take ony swhyche thyngys up on hym; and also I knowe veryly þat he scholl never love feythfully the todyr man þat ye desyiryd þat he schuld do, for when he remembryth the tyme þat is paste, and ther for I spak not to hym ther-of.

Thys day was holde a gret day at Okyll befor the undyr schreve and the undyr exchetor, for the mater of Syr Jon Fastolfys londys; and ther was my cosyn Rookwod and my cosyn Jon Berney of Redham, and dyvers odyr jentylmen and thryfty men of the contre; and the mater is well sped aftyr your intent (blyssyd be God!) as ye schall have knowlage of in hast.

I suppose Playter schall be with yow on Sonday or on Monday next comyng, if he may. Ye have many good prayers of the poer pepyl þat God schuld sped yow at thys Parlement, for they leve in hope þat ye schold helpe to set a wey þat they myte leve in better pese in thys contre thane they have do befor, and þat wollys schold be purveyd for, þat they schuld not go owt of thys lond as it hathe be suffryd to do be for, and thane schall the poer pepyll more leve bettyr thane they have do by her ocwpacion ther in.

Thomas Bone hathe salde all yowyr wole her for xx d. a stone, and goode swerte fownd to yow ther for, to be payid a Myhellmas next comyng; and it is solde ryth well aftyr þat the wole was, for the moste part was ryte febyll. Item, ther be bowt for yow iij. horse at Seynt Feythys feyer, and all be trotterys, ryth fayir horse, God save hem, and they be well kepyd. Item, your myllys at Heylysdon be late [_let_] for xij. marke, and the myller to fynde the reparacion; and Rychard Calle hathe let all yowyr londys at Caster; but as for Mawtby londys, they be not let yet. Wylliam Whyte hathe payid me a geyne thys daye hys x._li._, and I have mad hym a qwetans ther of, be cause I had not hys oblygacion.

Ther is gret talkyng in thys contre of the desyir of my Lorde of York22. The pepyll reporte full worchepfully of my Lord of Warwyk. They have no fer her but þat he and othyr scholde schewe to gret favor to hem þat have be rewyllers of thys contre be for tyme.

I have done all yowyr erandys to Syr Thomas Howes þat ye wrote to me for. I ame rythe glade þat ye have sped welle in yowyr materys be twyx Syr Fylyp Wentworthe and yow, and so I pray God ye may do in all othyr materys to hys plesans. As for the wrytyngys þat ye desyirid þat Playter schulde sende yow, Rychard Call[/!RichardCal ntold me þat they wer at Herry Barborys, at the Tempyll gate.

The mayir and the mayires sent hedyr her dynerys thys day, and Jon Dame came with hem, and they dynyd her. I am beholde to hem, for they have sent to me dyvers tymys sythe ye yed hense. The meyr seyth þat ther is no jentylman in Northefolk þat he woll do more for than he wole for yow, if it laye in hys poer to do for yow. J. Perse is stylle in prisone, but he wolle not confese more thane he ded when ye wer at home. Edmond Brome was with me, and tolde me þat Perse sent for hym for to come spek with hym, and he tolde me þat he was with hym and examynyd hym, but he wold not be a knowe to hym þat he hade no knowlage wher no goode was of hys masterys more thane he hade knowlageyd to yow. He tolde me þat he sent for hym to desyir hym to labor to yow and to me for hym if ye had be at home; and he tolde me þat he seyd to hym ayen þat he wold never labor for hym as a gentleman but he myth know þat he wer trwe to hys mastyr, thow it lay in hys power to do ryth myche for hym. I suppose it schulde do none harme thow the seyd Perse wer remevyd ferther. I pray to Gode yeve grace þat the trowthe may be knowe, and þat the dede may have part of hys owne goode. And the blissyd Trinyté have yow in Hys kepyng.

Wretyn in hast at Heylysden the Tuesday next aftyr Seynt Lwke.

Be yowyrs,

M. P.

Gairdner provides the information on the claim made by the Duke of York, 'My Lord of York', in this letter.

Back to previous page