Margaret Paston to John Paston, 28th September 1443

15/16th Century
Location of Original:
British Library

To my rygth worchepful husbond, John Paston, dwellyng in the Inner Temple at London, in hast.

Ryth worchipful hosbon, I recomande me to yow, desyryng hertely to her of yowr wilfar, thanckyng God of yowr a mendyng of the grete dysese that ye have hade; and I thancke yow for the letter that ye sent me, for be my trowthe my moder and I wer nowth in hertys es fro the tyme that we woste of yowr sekenesse, tyl we woste verely of your a mendyng. My moder be hestyd a nodyr ymmage of wax of the weytte of yow to oyer Lady of Walsyngham, and sche sent iiij. nobelys to the iiij. Orderys of Frerys at Norweche to pray for yow, and I have be hestyd to gon on pylgreymmays to Walsingham, and to Sent Levenardys for yow; be my trowth I had never so hevy a sesyn as I had from the tyme that I woste of yowr sekenesse tyl I woste of yowr a mendyng, and zyth myn hert is in no grete esse, ne nowth xal be, tyl I wott that ze ben very hal. Your fader and myn was dysday sevenyth at Bekelys for a matyr of the Pryor of Bromholme, and he lay at Gerlyston that nyth, and was ther tyl it was ix. of the cloke, and the toder day. And I sentte thedyr for a goune, and my moder seyde that I xulde have dan, tyl I had be ther a non, and so thei cowde non gete.

My fader Garneyss senttee me worde that he xulde ben her the nexch weke, and my emme also, and pleyn hem her with herr hawkys, and thei xulde have me hom with hem; and so God help me, I xal exscusse me of myn goyng dedyr yf I may, for I sopose that I xal redelyer have tydyngys from yow herr dan I xulde have ther. I xal sende my modyr a tokyn that sche toke me, for I sopose the time is cum that I xulde sendeth her, yf I kepe the be hest that I have made; I sopose I have tolde yow wat it was. I pray yow hertely that wol wochesaf to sende me a letter as hastely as ze may, yf wryhyn be non dysesse to yow, and that ye wollen wochesaf to sende me worde quowe your sor dott. Yf I mythe have had my wylle, I xulde a seyne yow er dystyme; I wolde ye wern at hom, yf it wer your ese, and your sor myth ben as wyl lokyth to her as it tys ther ze ben, now lever dan a goune zow it wer of scarlette. I pray yow yf your sor be hol, and so that ze may indur to ryde, wan my fader com to London, that ze wol askyn leve, and com hom wan the hors xul be sentte hom a zeyn, for I hope ze xulde be kepte as tenderly herr as ze ben at London. I may non leyser have to do wrytyn half a quarter so meche as I xulde sey to yow yf I myth speke with yow. I xall sende yow a nothyr letter as hastely as I may. I thanke yow that ze wolde wochesaffe to remember my gyrdyl, and that ze wolde wryte to me at the tyme, for I sopose that wrytyng was non esse for yow.

All myth God have yow in his kepyn, and sende yow helth. Wretyn at Oxenede, in ryth grete hast, on Sent Mikyllys Evyn.



My modyr grette yow wel, and sendyth yow Goddys blyssyng and hers; and sche prayeth yow, and I pray yow also, that ye be wel dyetyd of mete and drynke, for that is the grettest helpe that ye may have now to your helthe ward. Your sone faryth wel, blyssyd be God.

Back to previous page