Margaret Paston to John Paston the Younger, before 1466

Type: Letter
785
Era: 15/16th Century
Location of Original: British Library
Display:

To John Paston the younger.

I grete you wele, letyng you wete that asfor your sustrys beyng with my Lady, if your fader wull aggrey therto I hold me right wele pleasyd; for I wuld be right clad that she shuld do her servyse be for any other, if she cowde do that shuld pleas my ladyes good grace. Wherfor I wuld that ye shuld speke to your fader therof and lete hym wete that I am pleasid that she shuld be ther if he wuld, for I wuld be right glad and she myght be preferrid by mariage or be servyce, so that it myght be to her wurchep and profight in dischargyng of her frendis; and I pray you do your parte therin for your owyn wurchep and herys. And assone as ye may with ought daunger, purvey that I may have ageyn the vj. marks that ye wote of, for I wuld not that your fader wust it. Item, if ye pas London, send me ageyn my chene and the litill chene that I lent you be for, be sum trusty person; and if ye wull have my good wille, eschewe such thyngis as I spake to you of last in owr parisch chirch. I pray God make you as good a man as ever was any of your kynne, and Goddis blissyng mote ye have and myn, so that ye do wele, &c. Wretyn the Sonday next after your departyng.

And I pray you, send me sum tydyngis as sone as ye may after that ye be comyn to London, how your fader spedyth and your brother in here materes.

Be your moder.

Back to previous page