Sir John Paston to Margaret Paston, 18th April 1471

John Paston II
15/16th Century
Location of Original:
British Library

To my Moodre.

Moodre, I recomande me to yow, letyng yow wette that, blyssed be God, my brother John is a lyffe and farethe well, and in no perell off dethe. Never the lesse he is hurt with an arow on hys ryght arme, be nethe the elbow; and I have sent hym a serjon, whyche hathe dressid hym, and he tellythe me that he trustythe that he schall be all holl with in ryght schort tyme. It is so that John Mylsent is ded, God have mercy on hys sowle! and Wylliam Mylsent is on lyffe, and hys other servants all be askepyd by all lyklihod.

Item, as ffor me, I ame in good case, blyssyd be God; and in no joparte off my lyffe, as me lyst my self; for I am at my lyberte iff nede bee.

Item, my Lorde Archebysshop is in the Towr; neverthelesse I trust to God that he schall do well i noghe; he hathe a saffe garde for hym and me bothe. Neverthelesse we have ben troblyd syns, but nowe I undrestande that he hathe a pardon; and so we hope well.

Ther was kyllyd uppon the ffelde, halffe a myle ffrom Bernett, on Esterne Daye, the Erle of Warwyk, the Marqweys Montacu, Sir William Terrell, Sir Lewes Johns, and dyverse other Esquiers off owr contre, Godmerston and Bothe.

And on the Kynge Edwardes partye, the Lord Cromwell, the Lord Saye, Sir Omffrey Bowghsher off owr contre, whyche is a sore moonyd man her, and other peple off bothe partyes to the nombre off mor then a ml.

As for other tythynges, is undrestande her that the Qwyen Margrett is verrely londyd and hyr sone in the west contre, and I trow that as to morow, or ellys the next daye, the Kynge Edwarde wyll depart ffrom hense to hyr warde, to dryve her owt ageyn.

Item, I beseche yow that I may be recomendyd to my cosyn Lomner, and to thanke hym ffor hys goode wyll to me wardes, iff I had hadde nede, as I undrestoode by the berer heroff; and I beseche you on my behalve to advyse hym to be well ware off hys delyng or langage as yit, ffor the worlde, I ensur yow, is ryght qwesye, as ye schall know with in thys monthe; the peple heer feerythe it soor.

God hathe schewyd Hym selffe marvelouslye lyke Hym that made all, and can undoo ageyn whan Hym lyst; and I kan thynke that by all lyklyod schall schewe Hym sylff as mervylous ageyn, and that in schort tyme; and, as I suppose, offter than onys in casis lyke.

Item, it is soo that my brother is on purveyed off monye. I have holpyn hym to my power and above. Wherffor as it pleasythe yow remembre hym, ffor kan not purveye ffor my selffe in the same case.

Wretyn at London the thorysdaye in Esterne weke. I hope hastely to see yow.

All thys bylle most be secrett. Be ye not adoghtyd off the worlde, ffor I trust all schall be well. Iff it thusse contenewe, I ame not all undon, nor noon off us; and iff otherwyse, then, &c. &c.

Back to previous page